BAKI,VOA, Fərid Mikayılov
Rəcəb Tayyib Ərdoğan Qurban bayramı münasibətilə paylaşdığı mesajda bayramın bütün bəşəriyyət üçün xeyirli olmasını arzulayıb və xüsusilə Qəzza başda olmaqla İslam coğrafiyasındakı çətin vəziyyətdə olan bölgələrə həmrəylik mesajı göndərib.
VOA xəbər verir ki, Türkiyə Prezidenti sosial media hesabında yayımladığı paylaşımda Qurban bayramının mənəvi əhəmiyyətinə diqqət çəkib və münaqişə, çətinliklər və humanitar problemlərlə üzləşən bölgələrdə yaşayan insanların vəziyyətini xüsusi vurğulayıb.
Ərdoğan mesajında Qəzza və digər bölgələrdə bayramı kədər, ağrı və çətin şəraitdə qarşılayan insanlara Türkiyə xalqı və öz adından dəstək ifadə etdiyini bildirib.
Prezident həmçinin gələcəkdə sülhün, əmin-amanlığın, birlik və qardaşlığın hakim olduğu daha çox bayramlara qovuşmaq arzusunu dilə gətirib və Qurban bayramı münasibətilə təbriklərini çatdırıb.