BAKI,VOA, Fərid Mikayılov

Türkiyənin xarici işlər naziri Hakan Fidan mayın 21–22-də Helsinqborq şəhərində keçiriləcək NATO Xarici İşlər Nazirlərinin toplantısında iştirak edəcək.

VOA xəbər verir ki, iclasda Türkiyənin ev sahibliyi ilə iyulun 7–8-də Ankara şəhərində keçiriləcək NATO sammitinə hazırlıq məsələləri, Alyans daxilində birlik və əməkdaşlıq, müdafiə sənayesinin gücləndirilməsi, istehsal imkanlarının artırılması, Ukraynaya dəstəyin davam etdirilməsi və müdafiə xərclərinin hərbi imkanlara çevrilməsi kimi mövzular geniş müzakirə olunacaq.

Toplantıda həmçinin İran ətrafında baş verən hadisələrin, Hörmüz boğazı bölgəsindəki vəziyyətin Avro-Atlantik təhlükəsizliyinə təsirləri, NATO-nun cənub siyasəti və Rusiya-Ukrayna müharibəsi daxil olmaqla regional təhlükəsizlik məsələlərinin də gündəmdə olacağı gözlənilir.

İclas mayın 21-də Andriy Sibiha və Kaya Kallasın iştirak edəcəyi NATO–Ukrayna Şurasının qeyri-rəsmi işçi şam yeməyi ilə başlayacaq.

Bildirilib ki, Hakan Fidan çıxışı zamanı Türkiyənin Ukraynanın müstəqilliyi, suverenliyi və ərazi bütövlüyünə dəstəyini bir daha vurğulayacaq, həmçinin Rusiya–Ukrayna müharibəsinin dayandırılması istiqamətində Ankaranın diplomatik təşəbbüslərinə toxunacaq.