BAKI,VOA, Fərid Mikayılov
Türkiyə Prezidenti Rəcəb Tayyib Ərdoğan Qazaxıstanın paytaxtı Astanada həmkarı Kasım-Jomart Tokayev ilə keçirdiyi birgə mətbuat konfransında regional nəqliyyat və enerji layihələri barədə strateji bəyanatlar verib.
VOA xəbər verir ki, liderlər Türkiyə-Qazaxıstan Yüksək Səviyyəli Strateji Əməkdaşlıq Şurasının altıncı iclasından sonra bir çox sahəni əhatə edən sənədlər imzalayıblar.
"İpək Yolunun müasir qarşılığı olan Xəzər keçidli Şərq-Qərb Orta Dəhlizinin əhəmiyyəti qlobal miqyasda artmaqdadır. Türkiyə bu dəhlizi təkcə yük daşımaları üçün deyil, həm də enerji resurslarının qərbə çatdırılması üçün təşviq etməkdə qərarlıdır."- deyə Ərdoğan bildirib.
Ərdoğana iki ölkə arasındakı sarsılmaz qardaşlığın rəmzi olaraq "Xoca Əhməd Yasəvi Nişanı" təqdim edilib.
Ticarət və investisiya əlaqələri ilə yanaşı, hərbi və müdafiə sənayesi sahəsində əməkdaşlığı daha da irəli aparacaq layihələr müzakirə edilib.
Ərdoğan çıxışını qazax dilində "çox sağ olun" mənasını verən "köp rahmet" sözləri ilə yekunlaşdırıb.