BAKI,VOA, Nailə Babazadə

Türkiyə Prezidenti Rəcəb Tayyib Ərdoğan İstanbulda keçirilən Beynəlxalq Asiya Siyasi Partiyalar Konfransının (ICAPP) Qadın Qolu 9-cu İclasının iştirakçılarını qəbul edib.

VOA xəbər verir ki, görüş Prezidentin Dolmabahçedəki iş ofisində baş tutub.

Görüşdən əvvəl İstanbulun Bahçelievler səmtindəki otellərdən birində "Qlobal Transformasiya Dövründə Qadın Liderliyi" mövzusunda geniş konfrans keçirilib. Bu əhəmiyyətli toplantıda Asiya ölkələrindən gələn qadın siyasi liderlər, müxtəlif partiyaların təmsilçiləri və beynəlxalq ekspertlər iştirak ediblər. Konfransın yekununda Prezident Ərdoğan iştirakçıları qəbul edərək, qadınların siyasətdə və qlobal qərarların verilməsi prosesindəki rolunun vacibliyini vurğulayıb.

Qəbulda ICAPP Qadın Qolunun sədri seçilən AK Partiya Konya millətvəkili Məryəm Göka, AK Partiyanın bir qrup qadın millətvəkili, qadın qollarının üzvləri və Qaziantep Böyükşəhər Bələdiyyə sədri Fatma Şahin də iştirak ediblər. Görüşdə Asiya coğrafiyasında siyasi partiyalar arasında əməkdaşlıq, qadın hüquqlarının qorunması və gələcək layihələr ətrafında fikir mübadiləsi aparılıb.