BAKI,VOA, Nailə Babazadə

Türkiyənin Maşın və Kimya Sənayesi (MKE) tərəfindən istehsal olunan "Denizhan-76" milli dəniz topunun atış sınaqları və zavod qəbul testləri uğurla başa çatıb.

VOA xəbər verir ki, sayca altıncı olan bu yeni dəniz topu, fevral ayında suya endirilən və tamamlandıqdan sonra Türkiyənin beşinci milli freqatı olacaq "AKDENİZ" gəmisində əsas silah (baş top) kimi xidmət edəcək.

Yüksək texnoloji göstəriciləri ilə diqqət çəkən "Denizhan-76" dəqiqədə 80 atış etmə qabiliyyətinə malikdir. 16 kilometrə qədər təsirli atış imkanı təmin edən bu sistem, təkcə atış performansı ilə deyil, həm də aşağı radar izinə malik dizaynı və çoxfunksiyalı döyüş qabiliyyəti ilə seçilir. Silah həm hava hücumundan müdafiə, həm də suüstü və sahil hədəflərinə qarşı effektiv istifadə oluna bilir.

MKE dünyada yalnız bir neçə ölkənin inkişaf etdirə bildiyi 76 millimetrlik dəniz topunu 12 ay kimi rekord bir müddətdə istehsal etməyi bacarıb. Türkiyə bu strateji silahı ötən il həm də ixrac etməyə başlayıb. Artıq İndoneziya və Rumıniyaya "Denizhan-76" sistemlərinin satışı həyata keçirilib. Hazırda bu milli silah sistemi Türkiyənin dəniz sərhədlərini ("Mavi Vətən") qoruyacaq yeni freqatların əsas güc mənbəyinə çevrilib.