BAKI, AzerVoice, Nailə Babazadə

Türkiyənin xarici işlər naziri Hakan Fidan Türkiyə Prezidenti Rəcəb Tayyib Ərdoğan ilə Yunanıstanın Baş naziri Kiriakos Mitsotakis arasında yeni görüşün planlaşdırıldığını açıqlayıb.

AzerVoice xəbər verir ki, nazir Fidan tərəflərin bu görüşü fevral ayında, Ramazan ayı başlamazdan əvvəl reallaşdırmaq niyyətində olduqlarını bildirib. Hazırda Prezident Ərdoğanın proqramına uyğun olaraq bir neçə mümkün tarix üzərində iş aparılır. Nazir qeyd edib ki, Türkiyə tərəfi Ege dənizindəki ərazi suları və kontinental şelf məsələləri başda olmaqla bütün mövcud problemlərin köklü həlli üçün masaya oturmağa hazırdır.

Hakan Fidan Yunanıstanın daxili siyasi tarazlıqlarının bəzən bu cür kritik qərarların verilməsini çətinləşdirdiyini, lakin son iki ildə gərginliyin azaldılması istiqamətində müsbət addımların atıldığını vurğulayıb. Onun sözlərinə görə, Türkiyə tərəfi yaranmış tarixi fürsətdən istifadə edərək Ege problemlərini rasionallıq və mehriban qonşuluq prinsipləri çərçivəsində həll etməkdə qərarlıdır. Görüşün əsas məqsədinin iki ölkə arasındakı etimadı gücləndirmək və regionda daimi sülhü təmin etmək olduğu bildirilib.