BAKI,VOA, Fərid Mikayılov
Türkiyə ilə Kanada arasında imzalanması planlaşdırılan Azad Ticarət Sazişi (STA) üzrə danışıqların başlanması istiqamətində hazırlıq işlərinə start verilib.
VOA xəbər verir ki, bu qərar Türkiyə Prezidenti Rəcəb Tayyib Ərdoğan ilə Kanadanın Baş naziri Mark Karninin NATO Dövlət və Hökumət Başçılarının Zirvə Toplantısı çərçivəsində Ankarada keçirdikləri görüşdən sonra qəbul edilib.
Məlumata görə, yay ayları ərzində saziş üzrə danışıqlara hazırlıq məqsədilə geniş və intensiv iş aparılacaq. Türkiyənin Ticarət Nazirliyi danışıq prosesinin dövlət qurumları, özəl sektor, vətəndaş cəmiyyəti təşkilatları və digər maraqlı tərəflərin iştirakı ilə həyata keçirilməsini planlaşdırır.
Bu çərçivədə Türkiyə ilə Kanada arasındakı mövcud ticarət-iqtisadi əlaqələr və mümkün STA ilə bağlı təkliflərin toplanması üçün geniş sorğu ictimaiyyətə təqdim ediləcək. Əldə olunan rəylər əsasında Türkiyənin danışıq mövqeyi formalaşdırılacaq.
Texniki işçi qruplarının fəaliyyətini başa çatdırmasından sonra danışıqların çərçivə sənədi hazırlanacaq və ilk raundun cari ilin son rübündə keçirilməsi nəzərdə tutulur.
Qeyd edək ki, ötən il Türkiyə ilə Kanada arasında xarici ticarət dövriyyəsi 2,74 milyard ABŞ dolları təşkil edib. Türkiyənin Kanadaya ixracı 1,58 milyard dollar, idxalı isə 1,16 milyard dollar olub.
Bu ilin ilk beş ayında isə Türkiyənin Kanadaya ixracı 619,2 milyon dollar, Kanadadan idxalı isə 652,3 milyon dollar səviyyəsində qeydə alınıb.
Xatırladaq ki, iyunun əvvəlində Türkiyənin ticarət naziri Ömər Bolat və Kanadanın beynəlxalq ticarət naziri Maninder Sidhu arasında keçirilən görüşdə enerji, xüsusilə də nüvə energetikası sahəsində əməkdaşlığın genişləndirilməsi, eləcə də Kanadanın CANDU reaktor texnologiyasının Türkiyənin enerji strategiyasına mümkün töhfəsi də müzakirə olunmuşdu.
Gözlənilir ki, Azad Ticarət Sazişi üzrə danışıqlar müdafiə sənayesi, enerji və digər strateji sahələrdə əməkdaşlığın genişlənməsinə, həmçinin iki ölkə arasında ticarət dövriyyəsinin əhəmiyyətli dərəcədə artmasına töhfə verəcək.