BAKI, AzerVoice, Nailə Babazadə
Türkiyə ilə Oman arasındakı iqtisadi və ticari əlaqələri daha yüksək səviyyəyə daşımağı hədəfləyən OMNEX 2026 Oman-Türkiyə İş Forumu və Beynəlxalq Ticarət Sərgisi 2-4 fevral tarixlərində hər iki ölkənin iş dünyasını bir araya gətirəcək.
AzerVoice xəbər verir ki, DEİK Türkiyə-Oman İş Şurasının verdiyi məlumata görə, Omanın paytaxtı Maskat şəhərində keçiriləcək sərgidə 200-ə yaxın iri miqyaslı şirkət iştirak edəcək. Sərginin müdafiə sənayesi, qabaqcıl texnologiya, energetika, tikinti, səhiyyə və kənd təsərrüfatı kimi strateji sahələrdə milyardlarla dollarlıq yeni müqavilələrin imzalanmasına yol açacağı gözlənilir.
Omanın "2040 vizyonu" çərçivəsində modernləşmə prosesi ölkəni təkcə enerji ixracatçısı deyil, həm də Hind okeanı ilə Körfəz bölgəsi arasında güclü texnologiya və logistika mərkəzinə çevirməyi hədəfləyir. Türkiyə bu mötəbər tədbirdə "fəxri qonaq ölkə" statusu ilə təmsil olunacaq.
Xarici İqtisadi Əlaqələr Qurumu (DEİK) və Oman Ticarət və Sənaye Palatasının əməkdaşlığı ilə təşkil olunacaq forum çərçivəsində birbaşa təmaslar və fərdi görüşlər keçiriləcək. 2023-cü ildə təxminən 2 milyard dollar olan ticarət dövriyyəsinin yeni logistika və müdafiə sənayesi müqavilələri sayəsində qısa müddətdə 5 milyard dollara çatdırılması planlaşdırılır.
DEİK Türkiyə-Oman İş Şurasının sədri Yunus Ete qeyd edib ki, Oman sabit məzənnə rejimi, siyasi sabitliyi və investor dostu qanunvericiliyi ilə bölgənin ən təhlükəsiz biznes mühitlərindən biridir. Onun sözlərinə görə, Omanın ABŞ ilə Azad Ticarət Sazişinə sahib olması türk şirkətləri üçün qlobal bazarlara çıxışda böyük üstünlüklər və strateji investisiya imkanları yaradır.