BAKI,AzerVoice, Fərid Mikayılov

Türkiyənin daxili işlər naziri Ali Yerlikaya ölkə üzrə kiber cinayətlərə qarşı həyata keçirilən genişmiqyaslı əməliyyatlar nəticəsində 567 nəfərin saxlanıldığını, onlardan 209 nəfərin məhkəmə qərarı ilə həbs edildiyini bildirib.

AzerVoice xəbər verir ki, nazir sosial media hesabında paylaşdığı açıqlamada bildirib ki, 37 vilayətdə həyata keçirilən əməliyyatlar “onlayn uşaq müstəhcənliyi və təcavüzü”, “müxtəlif növ dələduzluq” və “qanunsuz mərc oyunları” kimi cinayətləri əhatə edib.

Son 10 gün ərzində aparılan tədbirlər nəticəsində 567 şübhəlidən 209-u həbs edilib, 112 nəfər barəsində məhkəmənin nəzarət tədbiri tətbiq olunub, digərləri ilə bağlı araşdırmalar isə davam edir.

Əməliyyatlar Baş prokurorluqlar, Daxili İşlər Nazirliyi nəzdindəki Kiber Cinayətlərlə Mübarizə Baş İdarəsi, Maliyyə Cinayətlərinin Araşdırılması Şurası (MASAK) və Şəhər Polis İdarələrinin Kiber Cinayətlərlə Mübarizə şöbələrinin birgə fəaliyyəti ilə həyata keçirilib.

Yerlikaya əməliyyatlarda iştirak edən hüquq-mühafizə orqanlarını təbrik edərək bildirib ki, kiber cinayətlərlə mübarizə Türkiyədə fasiləsiz və qətiyyətlə davam etdiriləcək.