BAKI, AzerVoice, Nailə Babazadə
Antalya, ilin 8 ayı ərzində hava yolu ilə gələn 11 milyon 702 min 733 xarici turisti qəbul edib.
Bu barədə AzerVoice -a Türkiyə Mədəniyyət və Turizm Nazirliyindən bildiriblər.
Antalya avqust ayında keçən ilin eyni dövrü ilə müqayisədə 37 min 953 nəfər artımla 2 milyon 711 min 395 turisti qarşılayıb. Bu dövrdə şəhərə ən çox turist göndərən ölkələr sırasında Rusiya birinci, Almaniya ikinci, Böyük Britaniya isə üçüncü yerdə qərarlaşıb.
İngiltərənin ardından Polşa, Rumıniya, Qazaxıstan, Ukrayna, Hollandiya, Çexiya və Slovakiya gəlir.
Avqust ayında keçən illə müqayisədə Ukraynadan gələn turistlərin sayı 29 faiz, Rusiyadan 6 faiz, Almaniyadan isə 5 faiz artıb.
1 yanvar – 31 avqust tarixləri arasında Antalya ümumilikdə 11 milyon 702 min 733 xarici turistin tətil istiqaməti olub. Bu dövrdə 2 milyon 664 min 54 turistlə Rusiya ilk sırada yer alıb. Rusiyanı 2 milyon 205 min 309 ziyarətçi ilə Almaniya, üçüncü sırada isə 1 milyon 116 min 23 nəfərlə Böyük Britaniya izləyib.