BAKI, AzerVoice, Səməd Əyyubov

Türkiyə Prezidenti Rəcəb Tayyib Ərdoğan Fələstin Dövlət Başçısı Mahmud Abbasla telefon danışığı aparıb.

AzerVoice xəbər verir ki, bu haqda Türkiyə Prezident Administrasiyasının Kommunikasiya İdarəsi məlumat verib.

Məlumata görə, söhbət zamanı İsrailin Qəzzaya qarşı hücumları və bölgədəki son vəziyyət müzakirə olunub.

Ərdoğan, İsrailin Qəzzanın bütün ərazisini hərbi nəzarət altına alma qərarının qətiyyən qəbul edilə bilməyəcəyini vurğulayıb və Türkiyənin regionda atəşkəsin təmin olunması üçün diplomatik səylərini davam etdirdiyini bildirib.

Fransa, Böyük Britaniya və Kanadanın Fələstin Dövlətini tanıya biləcəklərinə dair bəyanatlarının əhəmiyyətinə toxunan Ərdoğan, Qərbdə İsrailə qarşı tənqidlərin artdığını qeyd edib. O, Türkiyənin Fələstinin yanında dayanaraq bölgədə davamlı sülh və sabitliyin bərpası üçün çalışacağını vurğulayıb.

Qeyd edək ki, İsrail Təhlükəsizlik Kabineti Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.