BAKI, AzerVoice, Səməd Əyyubov – Türkiyə olaraq Suriya xalqının yanında olmağa və onların iradəsini dəstəkləməyə davam edəcəyik.
AzerVoice xəbər verir ki, bu sözlər Türkiyənin xarici işlər naziri Hakan Fidanın Suriya Prezidenti Əhməd əş-Şəraa ilə görüşündən sonra "X" sosial şəbəkəsində yaydığı paylaşımda yer alıb.
“Bu gün, Əsəd rejiminin devrilməsindən sonra doqquz ay ərzində üçüncü dəfə Dəməşqi ziyarət edirəm. Hər səfərimdə Suriyanın bir çox sahədə irəliləyiş əldə etdiyinin şahidi oluram” - deyə, o bildirib.
O, iki ölkə arasında əməkdaşlığın bütün sahələrdə genişləndirilməsində qərarlı olduqlarını vurğulayıb.
Fidanın sözlərinə görə, görüş zamanı ticarət, sərmayə, nəqliyyat və enerji kimi sahələrdə əməkdaşlıq imkanları müzakirə olunub. Həmçinin, Suriyanın yenidən qurulması üçün ikitərəfli və regional səviyyədə atıla biləcək addımlar da dəyərləndirilib.
Nazir bildirib ki, görüşdə xüsusilə təhlükəsizlik məsələləri ön planda olub.
“Suriya ərazilərinin suverenliyinə və siyasi birliyinə yönəlmiş daxili və xarici təhdidlər müzakirə olundu. Türkiyə olaraq, Suriyanın terror təşkilatlarına qarşı mübarizəsini dəstəkləməyə davam edəcəyik” - deyə, o qeyd edib.
O əlavə edib ki, Suriyanın şimal-şərqindəki düşərgələrin idarə olunması və təhlükəsizliyinin təmin olunması məsələsində Dəməşq rəhbərliyinə dəstək verməyə hazır olduqlarını bir daha bəyan ediblər.
Fidan bildirib ki, İsrailin Suriyanı hədəf alan siyasəti də müzakirə olunub.
“Suriya xalqı daha yaxşı gələcək qurmaq üçün tarixi bir fürsət əldə edib. Suriya hökuməti ölkəni daha sabit, təhlükəsiz və rifahlı etmək üçün eyni vaxtda bir çox çətinliklə mübarizə aparır. Bu çətinliklərin aşılması üçün ABŞ və Avropa ölkələri başda olmaqla, beynəlxalq ictimaiyyətin dəstəyi olduqca vacibdir” - deyə, o vurğulayıb.
Nazir qeyd edib ki, İsrail bölgədə sabitliyi pozmağa yönəlmiş siyasət aparır və bu siyasətə qarşı çıxmaq beynəlxalq ictimaiyyətin ortaq məsuliyyətidir.
Xatırladaq ki, 13 iyul tarixində Suriyanın Suveyda vilayətində ərəb qəbilələrinin döyüşçüləri ilə druz dəstələri arasında qarşıdurmalar baş verib. İyulun 15-də Suriya ordusu vilayətin inzibati mərkəzinə daxil olaraq, bölgədə sabitliyi təmin etmək üçün əməliyyatlara başlayıb. Ardınca İsrail, druz əhalisini qorumaq məqsədi ilə Suriyanın hərbi kolonlarını hədəfə almağa başladığını bəyan edərək hava hücumları həyata keçirməyə başlayıb.
16 iyul tarixində İsrail Hərbi Hava Qüvvələri Dəməşq və onun ətrafındakı bir sıra strateji obyektlərə, o cümlədən Suriya ordusunun Baş Qərargah kompleksinə, Əbu-Rummana rayonundakı Prezident Sarayına və paytaxtın qərbində yerləşən Mezze hərbi hava bazasına hava zərbələri endirib. Bu zərbələr nəticəsində Suriya təhlükəsizlik qüvvələrinin beş əməkdaşı həlak olub.
Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.