BAKI, AzerVoice

"Pakistan və Hindistan arasında atəşkəsi alqışlayırıq, dialoq üçün bu fürsət dəyərləndirilməlidir. "

AzerVoice xəbər verir ki, Prezident Rəcəb Tayyib Ərdoğan Azərbaycanın Müstəqillik Günü münasibətilə Laçına etdiyi səfərdən dönüşdə jurnalistlərə verdiyi açıqlamalarda Pakistan və Hindistan arasında əldə olunan atəşkəsi müsbət dəyərləndirib.

Pakistan və Hindistan arasında gərginliyin azaldılması istiqamətində atəşkəsin vacib addım olduğunu bildirən Türkiyə lideri, Pakistanın baş naziri Şahbaz Şərifin və digər rəsmilərin proses boyunca nümayiş etdirdiyi soyuqqanlı və məsuliyyətli yanaşmanı təqdir etdiyini deyib.

“Cənubi Asiyada davamlı sabitlik üçün tərəflər bu fürsəti səmərəli dəyərləndirməlidir. Əgər istək olarsa, bölgədə sülh üçün üzərimizə düşəni etməyə hazırıq”, – deyə Ərdoğan vurğulayıb.

Qeyd edək ki, Prezident həmçinin bildirib ki, Laçın Hava Limanının açılışında iştirak etməsi onun üçün xüsusi əhəmiyyət daşıyır. O, 30 illik işğaldan sonra Qarabağın azad olunmasının bölgəyə sülh və sabitlik gətirəcəyinə inandığını qeyd edib. Ərdoğan Laçın səfəri çərçivəsində Azərbaycan xalqını 28 May – Müstəqillik Günü münasibətilə təbrik edib və ona göstərilən qonaqpərvərliyə görə Azərbaycan xalqına təşəkkürünü bildirib.