BAKI, AzerVoice

Türk Dövlətləri Təşkilatının (TDT) Ağsaqqallar Şurası Şimali Kipr Türk Cümhuriyyətinin (KKTC) Girne şəhərində toplanıb.

AzerVoice xəbər verir ki, Türk Dövlətləri Təşkilatının (TDT) Ağsaqqallar Şurasının 17-ci iclası Şimali Kipr Türk Cümhuriyyətinin (KKTC) Girne şəhərində keçirilib.

Toplantı, Türk dövlətlərinin əlaqələrini gücləndirmək və birgə gələcək strategiyalarını müzakirə etmək məqsədilə təşkil edilib.

Girne otelində keçirilən toplantıya TDT Ağsaqqallar Şurasının sədri Binəli Yıldırım, TDT baş katibi Kubanıçbek Ömürəliyev, KKTC Ağsaqqalı İsmail Bozkurt, Azərbaycan Ağsaqqalı Həsən Həsənov, Qazax Ağsaqqalı İkram Adırbek, Qırğızıstan Ağsaqqalı Apas Cumaqulov və Özbəkistan nümayəndəsi T.T. qatılıb.

Toplantıda Binəli Yıldırım, KKTC-də keçirilən görüşün xüsusi əhəmiyyət daşıdığını və burada Türk Dövlətləri Təşkilatının müşahidəçi üzvü olan KKTC-nin fəaliyyətini qeyd edib. Yıldırım, həmçinin Türk dünyasının birgə güclənməsi, iqtisadi inteqrasiyanın artırılması və rəqəmsal gələcəyin əhəmiyyəti ilə bağlı çıxış edib.

Yıldırım, Orta Dəhlizin gücləndirilməsi və Türk dövlətlərinin rifahının artırılması üçün bu marşrutdan səmərəli istifadənin vacibliyini vurğulayıb. O, həmçinin Türk dövlətləri arasında əməkdaşlığın inkişafı üçün bir sıra mühüm məsələlərin müzakirə olunduğunu qeyd edib.