BAKI,VOA, Fərid Mikayılov

Türk dövlətləri arasında turizm sahəsində inteqrasiyanın gücləndirilməsi istiqamətində yeni təşəbbüslər irəli sürülüb.

VOA xəbər verir ki, Türkiyədə keçirilən beynəlxalq turizm tədbirində çıxış edən rəsmi şəxslər Türk Dövlətləri Təşkilatına üzv ölkələr arasında turizm potensialının artırılması üçün birgə addımların vacibliyini vurğulayıblar .

Məlumata əsasən, bu çərçivədə “ortaq muzey kartı”nın tətbiqi və üzv ölkələr arasında pasaportsuz gediş-gəlişi təmin edəcək mexanizmlər üzərində işlərin davam etdiyi bildirilib .

Qeyd olunub ki, turizm sahəsində əməkdaşlığın genişlənməsi iqtisadi və mədəni inteqrasiyanın güclənməsinə də töhfə verəcək. Eyni zamanda, regionda təhlükəsizlik və nəqliyyat sahəsində atılan addımların turizm inkişafına birbaşa təsir etdiyi vurğulanıb .

Bildirilib ki, hazırda Türk dövlətləri arasında turist mübadiləsi artmaqdadır və bu göstəricinin orta müddətdə 10 milyon, uzun müddətdə isə 30 milyon nəfərə çatdırılması hədəflənir .

Məlumata görə, ölkələr arasında uçuşların artırılması, qiymət siyasətinin optimallaşdırılması və nəqliyyat əlçatanlığının yaxşılaşdırılması turizmin inkişafı üçün əsas prioritetlərdən hesab olunur .

Qeyd edilib ki, turizm yalnız iqtisadi deyil, həm də xalqlar arasında mədəni yaxınlaşmanı təmin edən mühüm sahə kimi qiymətləndirilir.