BAKI,AzerVoice

İsrail qırıcıları Dəməşqin cənubunda iki mövqeyi bombaladı.AzerVoice xəbər verir ki, İsrail təyyarələri Dəməşqin təxminən 20 kilometr cənubunda yerləşən Əl-Kisva qəsəbəsini bombalayıb. Təhlükəsizlik mənbəsi İsrailin hərbi bir mövqeyi hədəf aldığını desə də, əlavə məlumat verməyib. Qəsəbə sakini və Suriya televiziyası İsrailin başqa hava hücumlarının cənub Dəraa əyalətində bir qəsəbəni vurduğunu bildirib.

İsrail ordusu sonradan verdiyi bəyanatda Cənub Suriyada hərbi hədəflərə, o cümlədən komandanlıq qərargahlarına və silah anbarları olan mövqelərə hücum etdiyini açıqlayıb. İsrail müdafiə naziri Yisrael Katsın sözçüsü bildirib: “Hərbi Hava Qüvvələri Cənub Suriyada güclü hücumlar həyata keçirir. Bu, bölgədə sakitliyi təmin etmək məqsədilə müəyyən etdiyimiz yeni siyasət çərçivəsindədir. Mesaj aydındır: Cənub Suriyanın Cənub Livana çevrilməsinə icazə verməyəcəyik.”

“Suriyanın rejim qüvvələri və ölkədəki terror təşkilatlarının Cənub Suriyada təhlükəsiz bölgədə möhkəmlənmək cəhdlərinə atəşlə cavab veriləcək.”-deyə o bildirib.

Qeyd edək ki, dekabr ayında müxalifət qüvvələrinin keçmiş prezident Əsədi devirməsindən sonra, BMT-nin nəzarətində olan Suriya ərazisində İsrail qüvvələri demilitarizasiya olunmuş zonaya daxil olub. İsrailin Baş naziri Benyamin Netanyahu bazar günü bildirib ki, İsrail Cənub Suriyada "Heyət Təhrir əş-Şam" qrupunun və ya ölkənin yeni rəhbərliyinə bağlı digər qüvvələrin mövcudluğuna icazə verməyəcək və bölgənin silahsızlaşdırılmasını tələb edib.