BAKI, AzerVoice, Nailə Babazadə

FIFA, 2034-cü ildə keçiriləcək Dünya Çempionatını 2035-ci ilin əvvəlinə keçirməyi planlaşdırır. Səbəb isə Ramazan ayının 2034-cü ildə noyabr və dekabr aylarına təsadüf etməsidir.

AzerVoice xəbər verir ki, "The Athletic"in məlumatına görə, 2034-cü ildə Səudiyyə Ərəbistanında təşkil olunacaq Dünya Çempionatının Ramazan ayına təsadüf etməsi səbəbindən FIFA turnirin 2035-ci ilin əvvəllərində keçirilməsini gündəmə alıb.

FIFA prezidenti Canni İnfantino bu barədə Avropa Klublar Assosiasiyasının (ECA) Baş Assambleyasında danışaraq, Dünya Çempionatlarının gələcəkdə ilin sonunda və ya başqa uyğun aylarda keçirilə biləcəyini bildirib.

İnfantino bəzi ölkələrdə yay aylarında temperaturun futbol oynamaq üçün olduqca yüksək olduğunu vurğulayıb.

“Bu məsələ ilə bağlı artıq detallı müzakirələr aparırıq. Məsələ təkcə Dünya Çempionatı ilə bağlı deyil – bu, ümumi futbol təqvimi ilə əlaqədar bir qiymətləndirmədir. Məsələn, bəzi Avropa ölkələrində iyul ayında futbol oynamaq çətinləşir. Buna görə də təqvimi yenidən düşünmək lazım gələ bilər.” - deyə qeyd edib.

İnfantino əlavə edib ki, iyun ayı futbol üçün ən əlverişli dövrlərdən biri olsa da, Avropada bu ay kifayət qədər səmərəli istifadə olunmur. O, bu vəziyyətin dəyişdirilməsi və qlobal futbol təqviminin daha səmərəli şəkildə optimallaşdırılması üçün yollar axtarıldığını vurğulayıb.

“Əgər dünyanın hər yerində eyni vaxtda futbol oynamaq istəyiriksə, bunu yəqin ki mart və ya oktyabr aylarında etmək mümkündür. Çünki dekabrda dünyanın bir hissəsində, iyulda isə başqa bir hissəsində oyun keçirmək çətin olur. Milli komandaların oyun təqvimi, futbolçuların azad buraxılması və klub turnirlərini nəzərə alaraq hər kəs üçün balanslı bir sistem yaratmaq lazımdır. Müzakirə etdiyimiz çox məsələ var.” - deyə FIFA prezidenti qeyd edib.