BAKI,VOA Orxan Qədirzadə
Beynəlxalq Futbol Federasiyasının (FIFA) sabiq prezidenti Yozef Blatter ABŞ Prezidenti Donald Trampın ABŞ milli komandasının futbolçusu Folarin Baloqunun cəzasının ləğvinə təsir göstərdiyi barədə yayılan məlumatları sərt tənqid edərək futbolun siyasi təsir vasitəsinə çevrilməməli olduğunu bildirib.
Blatter "X" sosial şəbəkəsində paylaşdığı açıqlamada qırmızı vərəqələrin siyasi müdaxilə ilə deyil, yalnız mövcud qaydalar, sübutlar və müstəqil qərarverici orqanların qərarları əsasında ləğv edilməli olduğunu vurğulayıb.
"Qırmızı vərəqələr siyasi telefon zəngləri ilə ləğv edilmir. Onlar yalnız qaydalar, sübutlar və müstəqil qurumların qərarları əsasında qüvvədən düşə bilər", – deyə Blatter qeyd edib.
O əlavə edib ki, əgər ABŞ Prezidenti FIFA prezidentinə zəng etdikdən sonra futbolçu qəfil dünya çempionatının pley-off mərhələsində oynamaq hüququ qazanırsa, bu halda "FIFA hara doğru gedir?" sualı qaçılmaz olur.
Sabiq FIFA prezidenti futbolun heç vaxt siyasi nüfuz mübarizəsinin meydanına çevrilməməli olduğunu da bildirib.
Məsələ ABŞ yığmasının Bosniya və Herseqovinanı 2:0 hesabı ilə məğlub etdiyi dünya çempionatının 1/16 final mərhələsində baş verən hadisə ilə bağlıdır. Həmin qarşılaşmada Folarin Baloqun qırmızı vərəqə alaraq meydandan kənarlaşdırılmış və qaydalara əsasən Belçikaya qarşı keçiriləcək növbəti oyunu buraxmalı idi.
Lakin FIFA bazar günü axşam futbolçuya tətbiq olunan cəzanın icrasını bir il müddətinə dayandırdığını açıqlayıb və bununla da onun Belçikaya qarşı oyunda iştirakına imkan yaradıb.
ABŞ mətbuatının məlumatına görə, Donald Tramp bu qərardan əvvəl FIFA prezidenti Canni İnfantino ilə telefon danışığı aparıb. Məlumatlı mənbələr söhbətin məhz Baloqunun cəzası ilə bağlı olduğunu iddia ediblər.
Belçika Futbol Federasiyası futbolçunun meydana buraxılması qərarını təəccüblə qarşıladığını bildirib. FIFA-nın qərarı və prosesə siyasi müdaxilə ehtimalı iddiaları beynəlxalq futbol ictimaiyyətində də geniş müzakirələrə səbəb olub.
FIFA və Ağ Ev isə məsələ ilə bağlı hələlik rəsmi açıqlama verməyib. Eyni zamanda, FIFA Baloquna tətbiq olunan cəzanın icrasının niyə dayandırıldığına dair əsaslandırma da təqdim etməyib.
Folarin Baloqun turnirdə ABŞ millisinin əsas oyunçularından biri hesab olunur. O, dünya çempionatında indiyədək üç qol vurub və komandanın 2002-ci ildən bəri ilk dəfə dörddəbir finala yüksəlmək şanslarının artırılmasında mühüm rol oynaya bilər.