BAKI,VOA Orxan Qədirzadə
Beynəlxalq Futbol Federasiyasının prezidenti Canni İnfantino ABŞ-də keçirilən 2026-cı il futbol üzrə dünya çempionatı ərəfəsində yaranan viza problemləri və bəzi iştirakçıların ölkəyə girişinə icazə verilməməsi ilə bağlı narahatlıqlara cavab verib.
Meksikanın paytaxtında keçirilən mətbuat konfransında çıxış edən FIFA rəhbəri bildirib ki, təşkilat əsasən idman qurumu kimi fəaliyyət göstərir və dövlətlərin immiqrasiya siyasətinə müdaxilə etmək səlahiyyətinə malik deyil.
İnfantino qeyd edib ki, FIFA bütün hallarda problemlərin həlli üçün çalışır, lakin hökumətlərin və təhlükəsizlik qurumlarının qərarlarını dəyişdirmək imkanına sahib deyil.
Onun sözlərinə görə, təşkilat əlində olan imkanlardan maksimum istifadə edərək həll yolları axtarır, lakin dövlətlərin suveren qərarlarına hörmətlə yanaşmalıdır.
Dünya çempionatına bir neçə gün qalmış ABŞ hakimiyyətinin Somalidən olan hakim Ömər Artanın ölkəyə girişinə icazə verməməsi geniş müzakirələrə səbəb olub. Məlumata görə, hakimin etibarlı vizası olsa da, ABŞ sərhəd xidmətləri onun ölkəyə daxil olmasına icazə verməyib.
Hadisəni “təəssüf doğuran vəziyyət” adlandıran İnfantino ABŞ tərəfinin qərarının səbəbləri barədə ətraflı məlumata malik olmadığını bildirib.
Qərardan sonra FIFA Ömər Artanı dünya çempionatında iştirak edəcək hakimlər siyahısından çıxarıb.
FIFA prezidentinin açıqlamaları ABŞ Prezidenti Donald Trampın dünya çempionatı ilə bağlı son bəyanatlarından sonra səsləndirilib.
Tramp administrasiyasının ölkəyə “doğru insanların” daxil olmasını təmin etmək üçün çalışdığını bildirib.
İnfantino isə bəzi hallarda problemlərin həlli üçün emosional reaksiyalar vermək əvəzinə səbirli davranmağın daha faydalı olduğunu vurğulayıb.
“Bəzən dərhal etiraz etmək və yüksək səslə reaksiya vermək problemin həllini daha da çətinləşdirə bilər”, – deyə FIFA rəhbəri bildirib.
O, həmçinin FIFA-nın ABŞ-ni dünya çempionatının ev sahibi ölkələrindən biri kimi seçdiyinə görə peşman olmadığını da qeyd edib.
İran məsələsi diqqət mərkəzindədir
2026-cı il dünya çempionatı tarixdə ilk dəfə olaraq ev sahibi ölkələrdən birinin müharibə vəziyyətində olduğu dövlətin milli komandasını qəbul etdiyi turnir kimi də yadda qala bilər.
ABŞ və İsrailin İranla bağlı hərbi qarşıdurması fonunda İran millisinin turnirdə iştirakı beynəlxalq ictimaiyyətin diqqət mərkəzindədir.
Məlumata görə, İran milli komandasının futbolçularına Los-Ancelesdə keçiriləcək ilk oyundan 10 gün əvvəl ABŞ vizaları təqdim olunub.
İran yığması hazırlıq prosesini Meksikada davam etdirir və ABŞ-də keçiriləcək oyunlara qatıldıqdan sonra yenidən Meksikanın Tixuana şəhərinə qayıdacaq.
İnfantino bildirib ki, FIFA bu məsələlərdə passiv mövqe tutmur və iştirakçıların problemlərinin həlli istiqamətində pərdəarxası danışıqlar aparır.
“Biz heç nə etmədən gözləmirik. Arxa planda işləyirik, vəziyyəti anlamağa və həll yolu tapmağa çalışırıq. Bəzi məlumatlar bizə təqdim olunur, bəzi məlumatlar isə verilmir. Buna baxmayaraq, hər zaman müsbət nəticə əldə etməyə çalışırıq”, – deyə o vurğulayıb.
FIFA prezidenti İran millisinin ABŞ-də çıxış etməsinin təmin olunmasını təşkilatın mühüm uğurlarından biri kimi qiymətləndirib.
Tarixin ən böyük dünya çempionatı
ABŞ, Kanada və Meksikanın birgə ev sahibliyi edəcəyi 2026-cı il dünya çempionatı ilk dəfə 48 komandanın iştirakı ilə keçirilir.
Turnir iyunun 11-də start götürəcək və bir aydan artıq davam edəcək. Yarış dünyanın müxtəlif bölgələrindən minlərlə futbolçu, məşqçi, hakim və azarkeşi bir araya gətirəcək.
Lakin yüksək bilet qiymətləri, uzun məsafəli səfərlər, viza prosedurları və geosiyasi gərginliklər turnirin təşkilatçıları üçün əlavə çağırışlar yaratmağa davam edir.