BAKI, AzerVoice
Portuqaliyalı futbol ulduzu Kriştianu Ronaldo, Əl-Nəsr rəhbərliyindən Liverpulun ulduz futbolçusu Luis Diazın transferi üçün hərəkətə keçməyi tələb edir.
AzerVoice xəbər verir kiİddialara görə, Ronaldo kolumbiyalı cinah hücumçusunun transferi uğrunda Barselona və Bavariya ilə rəqabətə qoşulmaqda israrlıdır.
Luis Diaz 2024–25 mövsümündə Liverpulla Premyer Liqa çempionluğunu yaşasa da, gələcəyi ilə bağlı suallar artmaqdadır. Dünyanın müxtəlif klublarından böyük məbləğdə təkliflər gözlənilir. Xüsusilə Barselona Diazı Lamin Yamal və Robert Levandovski ilə hücum xəttində birləşdirmək istəyir. Lakin maliyyə imkanlarının məhdudluğu səbəbindən Kataloniya nəhəngi transferi reallaşdırmaqda çətinlik çəkir.
Almaniyanın Bavariya klubu da Diazla maraqlanır və bu transferin Hərri Keyn üçün yeni ötürmə imkanları yaradacağı bildirilir.
Səudiyyə Ərəbistanında Əl-Nəsr ilə rekord məbləğdə yeni iki illik müqavilə imzalayan Ronaldo klubda transfer siyasətinə daha çox təsir imkanına sahib olub. Məlumata görə, o, şəxsən Diazın komandaya cəlb olunması üçün çağırışlar edir və rəhbərliyə təzyiq göstərir.
28 yaşlı kolumbiyalı futbolçu hələlik Liverpuldan ayrılmaq niyyətini açıq şəkildə bildirməyib. Bununla belə, Səudiyyə Ərəbistanında təklif olunan yüksək məvacib və digər cazibədar imkanlar onun qərarına təsir göstərə bilər. Diazın Kolumbiya yığmasındakı mövqeyi isə təhlükə altında deyil – çünki Səudiyyə Pro Liqasında artıq bir neçə kolumbiyalı futbolçu çıxış edir.
Hazırda transfer bazarında vəziyyət gərgin olaraq qalır və Luis Diazın gələcək ünvanı yaxın günlərdə futbol ictimaiyyətinin diqqət mərkəzində olacaq.