BAKI,VOA Orxan Qədirzadə

Səudiyyə Ərəbistanında Həcc mövsümü çərçivəsində Baş Sərhəd Mühafizəsi İdarəsinin qadın əməkdaşları müqəddəs məkanlarda xidmətə cəlb olunub.

VOA-nın ərəb mətbuatına istinadən verdiyi məlumata görə, qadın sərhəd mühafizəçiləri ziyarətçilərin hərəkətinin koordinasiyası, istiqamətləndirilməsi, təhlükəsizlik yoxlamaları, nəqliyyat axınının tənzimlənməsi və sahə əməliyyatlarına dəstək kimi vəzifələri yerinə yetirirlər.

Bildirilir ki, bu addım Həcc ziyarətçilərinin təhlükəsizliyinin təmin olunması, xidmət keyfiyyətinin artırılması və ibadət mərasimlərinin rahat şəkildə yerinə yetirilməsi məqsədi daşıyır.

Eyni zamanda, sərhəd mühafizə xidmətinin könüllüləri də müqəddəs məkanlarda fəaliyyət göstərirlər. Onlar müxtəlif dillərdə məlumatlandırma aparır, ziyarətçilərin suallarını cavablandırır və insan axınının nizamlı idarə olunmasına yardım edirlər.

Məlumata əsasən, Baş Sərhəd Mühafizəsi İdarəsi axtarış-xilasetmə və fövqəladə hallara operativ müdaxilə işlərində də iştirak edir. Bu fəaliyyətlərin Həcc mərasimlərinin təhlükəsiz və fasiləsiz keçirilməsinə töhfə verdiyi vurğulanır.