Baku, AzerVoice

Sudanda Ağ Nil əyalətində Çevik Dəstək Qüvvələrinin (RSF) hücumları nəticəsində yüzlərlə mülki şəxs, o cümlədən uşaqlar həlak olub.

AzerVoice xəbər verir ki,Sudan Xarici İşlər Nazirliyi yarımhərbi qrupun Sudan ordusunun əlində məğlub olduqdan sonra Katina bölgəsindəki kəndlərdə mülki əhalini hədəf aldığını bildirib. Açıqlamalara görə, ölənlərin sayı rəsmi mənbələrə görə 433, Sudan Həkimlər Sindikatının məlumatına görə isə ən azı 300 nəfərdir.

İnsan hüquqlarını izləyən Fövqəladə Hüquqşünaslar qrupu son üç gündə həyata keçirilən hücumlarda 200-dən çox insanın, o cümlədən qadınların və uşaqların öldüyünü, yüzlərlə insanın yaralandığını açıqlayıb. Hücumlar arasında edamlar, adam oğurluğu, zorla yoxa çıxma, qarət və qaçmağa çalışanlara atəş açılması halları qeydə alınıb.

Sudan ordusu şənbə günü Ağ Nil əyalətində irəlilədiyini və bir sıra şəhər və kəndləri azad etdiyini elan edib. Ordu həmçinin RSF üçün strateji əhəmiyyət daşıyan təchizat yollarını kəsdiyini bildirib.

BMT-nin məlumatına görə, Sudandakı müharibə nəticəsində 24 mindən çox insan həyatını itirib, 14 milyondan çox insan (əhalinin 30%-i) evlərini tərk edib. Onlardan təxminən 3,2 milyonu qonşu ölkələrə sığınıb. BMT İnsan Hüquqları Bürosu 2024-cü ilin əvvəlinə qədər 4200-dən çox mülki şəxsin öldüyünü sənədləşdirib, lakin real sayın bundan daha çox olduğu bildirilir.