BAKI, VOA, Nailə Babazadə
Birləşmiş Millətlər Təşkilatının (BMT) Təhlükəsizlik Şurası Darfurun Əl-Faşer şəhərində törədilən dəhşətli cinayətlərə görə Çevik Dəstək Qüvvələrinin (RSF) dörd yüksək rütbəli komandirinə qarşı sanksiya tətbiq olunması barədə qərar qəbul edib.
VOA xəbər verir ki, BMT-nin keçən həftə apardığı araşdırma nəticəsində RSF-nin 18 ay davam edən mühasirə və oktyabrda Əl-Faşerin ələ keçirilməsi zamanı soyqırımı aktları törətdiyi müəyyən olunub. Sanksiya siyahısına daxil edilənlər arasında RSF komandirinin müavinləri Əbdülrəhim Hamdan Daqlo və Qedo Hamdan Əhməd, briqada generalı Əl-Fateh Abdullah İdris və səhra komandiri Tijani İbrahim yer alıb.
2023-cü ilin aprelindən bəri Sudan mütəmadi ordu ilə RSF arasında "dəhşətli müharibə" meydanına çevrilib. Bu münaqişə on minlərlə insanın ölümünə, həmçinin dünyanın ən böyük aclıq və məcburi köçkünlük böhranına səbəb olub.
Oktyabrın 26-da şəhərin zəbt edilməsi ilə nəticələnən kampaniya BMT tərəfindən "üç günlük dəhşət" kimi xarakterizə edilib. Bu müddət ərzində əsasən etnik Zağava əhalisinə qarşı kütləvi edamlar, sistematik cinsi zorakılıq və kütləvi həbslər həyata keçirilib.
RSF rəhbəri Məhəmməd Hamdan Daqlonun qardaşı olan Əbdülrəhimin döyüşçülərinə "heç kimi əsir götürməmək və hər kəsi öldürmək" barədə birbaşa əmr verdiyi görüntülər sanksiya qərarına əsas olub. O, artıq ABŞ, Böyük Britaniya və Avropa İttifaqı tərəfindən sanksiya siyahısına salınmışdı.
Siyahıda yer alan digər şəxs, "Əl-Faşer qəssabı" kimi tanınan Abdullah İdris (Abu Lulu) isə insanların ondan rəhm dilədiyi anlarda onları gülərək öldürdüyü və etnik zəmində edamlar həyata keçirdiyi videoları özü paylaşdığı üçün bu adı alıb. BMT-nin bu qərarı beynəlxalq ictimaiyyətin Sudandakı insanlıq əleyhinə cinayətlərə qarşı ən sərt reaksiyalarından biri kimi qiymətləndirilir.