BAKI,VOA, Nailə Babazadə

Sudanda təxminən iki il davam edən və ölkəni dərin humanitar böhrana sürükləyən dağıdıcı müharibədən sonra paytaxt Xartumda həyat yenidən canlanmağa başlayıb.

VOA xəbər verir ki,21 may 2025-ci ildə Sudan ordusunun şəhər üzərində tam nəzarəti təmin etməsindən sonra hökumət paytaxtın infrastrukturunu bərpa etmək və dövlət institutlarını geri qaytarmaq üçün genişmiqyaslı addımlar atıb. Bu bərpa prosesinin ən mühüm mərhələsi kimi, 2026-cı ilin yanvarında müvəqqəti inzibati mərkəz olan Port-Sudandan bütün dövlət qurumlarının rəsmən Xartuma qayıtması qeyd olunub.

BMT-nin son hesabatlarına görə, təhlükəsizliyin stabilləşməsi nəticəsində son bir il ərzində 4 milyondan çox didərgin düşmüş sudanlı öz evlərinə dönüb. Paytaxtın mərkəzi küçələrində müharibənin izləri hələ də qalsa da, iqtisadi aktivlik sürətlə bərpa olunur. Eczanələr, iri ticarət mərkəzləri, otellər və mebel mağazaları artıq qapılarını müştərilərin üzünə açıb. Şəhərdə çalışan yerli və əcnəbi sahibkarlar, o cümlədən türkiyəli və suriyalı biznesmenlər təhlükəsizliyin müharibə öncəsi dövrdən belə daha yüksək səviyyədə olduğunu, elektrik və su təchizatı kimi fundamental xidmətlərin böyük ölçüdə bərpa edildiyini vurğulayırlar.

Lakin Sudan hələ də dünyanın ən böyük humanitar krizislərindən birinin fəsadlarını aradan qaldırmağa çalışır. 15 aprel 2023-cü ildə başlayan münaqişə nəticəsində ümumilikdə 11 milyondan çox insan ölkə daxilində yerindən edilib, 4 milyona yaxın insan isə qonşu dövlətlərə sığınıb. Hazırda Xartumda həyata keçirilən yenidənqurma işləri həm iqtisadiyyatın dirçəldilməsi, həm də didərgin düşmüş milyonlarla insanın öz doğma yurdlarına təhlükəsiz qayıdışını təmin etmək baxımından kritik əhəmiyyət kəsb edir.