BAKI,VOA,Yusif Şərifzadə

Qətər Xarici İşlər Nazirliyi İraq Kürdüstan Regional Hökumətinin başçısı Məsrur Bərzaninin qərargahına pilotsuz uçuş aparatları ilə edilən hücumu kəskin şəkildə pisləyib. Doha hücumu İraq Respublikasının və İraq Kürdüstanının suverenliyinin açıq şəkildə pozulması, həmçinin beynəlxalq hüquq normalarının kobud şəkildə tapdanması kimi qiymətləndirib.

VOA xəbər verir ki, bazar ertəsi həyata keçirilən hücum zamanı təkcə Məsrur Bərzaninin qərargahı deyil, İraq Kürdüstanının təhlükəsizlik və kəşfiyyat qurumunun rəhbərinin qərargahı da hədəfə alınıb. Qətər Xarici İşlər Nazirliyi çərşənbə axşamı yaydığı bəyanatda belə hücumların bölgədə təhlükəsizlik və sabitlik üçün yaratdığı təhlükəyə diqqət çəkib.

Qətər tərəfləri bölgəni əsassız hücumların doğura biləcəyi ağır nəticələrdən qorumağa çağırıb. Doha mübahisələrin dialoq və diplomatiya yolu ilə həllinə, eləcə də gərginliyin azaldılmasına üstünlük verilməsinin vacibliyini vurğulayıb.

Qətər Xarici İşlər Nazirliyinin fikrincə, bu yanaşma həm bölgədə, həm də beynəlxalq səviyyədə təhlükəsizlik və sabitliyin möhkəmləndirilməsinə töhfə verə bilər. Doha İraqın suverenliyinə və ərazi bütövlüyünə hörmət edilməsinin vacibliyini bir daha vurğulayıb.

İraq Kürdüstanının Terrorla Mübarizə Xidməti hücumlarda “Hədid-110” tipli iki pilotsuz uçuş aparatından istifadə edildiyini açıqlayıb. İraqın dövlət xəbər agentliyinin yaydığı məlumata görə, hadisə ilə bağlı araşdırmalar davam etdirilir.

İraq Kürdüstanının təhlükəsizlik və kəşfiyyat qurumu isə pilotsuz uçuş aparatlarının İran ərazisindən buraxıldığını iddia edib. Bununla belə, ilkin məlumatlarda aparatların nəzərdə tutulan hədəflərə dəqiq zərbə endirib-endirmədiyi barədə aydın məlumat verilməyib. İran tərəfinin bu ittihama münasibəti barədə məlumat yoxdur.