Qətər İraq Kürdüstan Regional Hökumətinin başçısı Məsrur Bərzaninin qərargahına pilotsuz uçuş aparatları ilə hücumu pisləyib. Doha hadisəni İraqın və İraq Kürdüstanının suverenliyinin pozulması kimi qiymətləndirib. Hücum zamanı bölgənin təhlükəsizlik və kəşfiyyat qurumunun rəhbərinin qərargahının da hədəfə alındığı bildirilir. Qətər tərəfləri yeni hərbi gərginlikdən çəkinməyə çağırıb. Doha problemlərin dialoq və diplomatiya vasitəsilə həll edilməsinin vacibliyini vurğulayıb. İraq Kürdüstanının Terrorla Mübarizə Xidmətinə görə, hücumlarda “Hədid-110” tipli iki pilotsuz uçuş aparatından istifadə olunub. Kürdüstanın təhlükəsizlik və kəşfiyyat qurumu aparatların İran ərazisindən buraxıldığını iddia edib. Hücumların bölgədəki siyasi və təhlükəsizlik gərginliyini daha da artıracağı ilə bağlı narahatlıq yaranıb.