BAKI,VOA, Fərid Mikayılov

Aİ-nin Xarici işlər və təhlükəsizlik siyasəti üzrə ali nümayəndəsi Kaya Kallas Lüksemburqda keçirilən Aİ Xarici İşlər Şurasının iclası ərəfəsində jurnalistlərə açıqlamasında bildirib ki, Azərbaycan ilə Ermənistan arasında münasibətlərin normallaşdırılması Aİ-nin gündəliyində mühüm yer tutur.

VOA xəbər verir ki, onun sözlərinə görə, müzakirələr çərçivəsində Aİ-nin hər iki ölkə ilə gələcək əməkdaşlıq perspektivləri də nəzərdən keçiriləcək.

“Bizim üçün Ermənistan, Azərbaycan və onların münasibətlərinin normallaşması son dərəcə böyük önəm kəsb edir”, – deyə Kallas vurğulayıb.

Kallas əlavə edib ki, Ermənistan üçün yeni missiya və Bakı ilə İrəvan arasında dialoqun gələcək mərhələsi də gündəmdədir.

Bundan başqa, Aİ regionda baş verən prosesləri, o cümlədən Gürcüstan-dakı vəziyyəti diqqətlə izləməyə davam edir.

Analitiklər hesab edir ki, Brüsselin bu mövqeyi regionda diplomatik proseslərin intensivləşməsinə və yeni əməkdaşlıq mexanizmlərinin formalaşmasına təkan verə bilər.