BAKI,VOA Orxan Qədirzadə
Avropa İttifaqı (Aİ) Ukraynadakı müharibə ilə əlaqədar Rusiyaya qarşı son 4 ilin ən genişmiqyaslı sanksiya paketini təsdiqləyib.
Aİ Şurasının məlumatına görə, yeni məhdudiyyətlər çərçivəsində Rusiya ilə əlaqəli 218 fiziki və hüquqi şəxs sanksiya siyahısına daxil edilib.
Aİ ölkələri həftələrlə davam edən danışıqlardan sonra Rusiyaya qarşı 21-ci sanksiya paketi üzrə siyasi razılığa gəlib və daha sonra sənədi rəsmi şəkildə qəbul edib.
Maliyyə sektoruna yeni məhdudiyyətlər
Yeni sanksiya paketi çərçivəsində 94 bank və iri maliyyə qurumunun aktivləri dondurulub.
Bundan əlavə, 33 Rusiya maliyyə təşkilatına əməliyyat məhdudiyyətləri tətbiq edilib. Sanksiyalardan yayınmağa kömək etdiyi bildirilən Rusiya xaricindəki 4 bank və 14 kriptovalyuta platforması da siyahıya daxil edilib.
Aİ həmçinin Rusiyanın istifadə etdiyi kriptovalyuta xidmətlərini təqdim edən üçüncü ölkələrə qarşı geniş əməliyyat qadağalarının tətbiqinə imkan verən mexanizm yaradıb.
"Kölgə donanma" və enerji sektoruna zərbə
Aİ Şurasının açıqlamasına əsasən, Rusiyanın neft ixracında istifadə etdiyi "kölgə donanmaya" aid daha 41 gəmi sanksiya siyahısına əlavə olunub.
Bununla da sanksiya tətbiq edilən Rusiya ilə əlaqəli gəmilərin ümumi sayı 673-ə yüksəlib.
Yeni məhdudiyyətlər çərçivəsində Rusiyadakı üç neft emalı zavodu və Belarusdakı böyük bir neft emalı müəssisəsi daxil olmaqla, enerji sektorunda fəaliyyət göstərən 19 şəxs və qurum da hədəfə alınıb.
Bundan əlavə, Rusiya müdafiə sənayesi ilə əlaqəli 56 şəxs və təşkilat sanksiya siyahısına daxil edilib.
Aİ Rusiyadan alınan neftə tətbiq olunan qiymət tavanını da bazar dəyişikliklərinə qarşı bir il müddətinə sabit saxlayıb.
Kallas: Rusiya iqtisadiyyatının əsas sahələri hədəf alınıb
Aİ-nin Xarici Əlaqələr və Təhlükəsizlik Siyasəti üzrə ali nümayəndəsi Kaya Kallas bildirib ki, yeni paket Rusiyanın "müharibə iqtisadiyyatını təmin edən maliyyə sistemi, hərbi sənaye kompleksi və enerji sektoruna" qarşı yönəlib.
Kallasın sözlərinə görə, 21-ci sanksiya paketi Rusiya Prezidenti Vladimir Putinin rəhbərliyinin müharibəni davam etdirmək üçün istifadə etdiyi maliyyə imkanlarını məhdudlaşdırmağa yönəlib.
O bildirib ki, yeni tədbirlər çərçivəsində 100-dən çox bank və kriptovalyuta xidmət təminatçısı, 40-dan çox "kölgə donanma" gəmisi, Rusiya və Belarusdakı neft emalı müəssisələri, eləcə də uzaqmənzilli pilotsuz uçuş aparatlarının istehsalında iştirak edən 50-dən çox müdafiə sənayesi qurumu hədəfə alınıb.
Yunanıstan sanksiya paketinə etiraz edib
Rusiya əleyhinə yeni sanksiya paketinə ən ciddi etiraz Yunanıstandan gəlib.
Məlumata görə, Avropanın mayeləşdirilmiş təbii qaz (LNG) daşımalarında əsas ölkələrindən biri olan Yunanıstan 2027-ci ilin yanvarından qüvvəyə minməsi planlaşdırılan Rusiya LNG qadağasına dəyişiklik edilməsini tələb edib.
Afina Rusiya LNG-sinin Avropa İttifaqından kənar bazarlara daşınmasının davam etdirilməsi üçün geniş istisna mexanizmi istəyib.
Gərgin danışıqlardan sonra Yunanıstana bir illik istisna verilməsi ilə bağlı razılıq əldə olunub.