BAKI,VOA, Fərid Mikayılov

İran Prezidenti Məsud Pezeşkian Pakistanın müstəqilliyinin 79-cu ildönümü münasibətilə Pakistan xalqını təbrik edib və iki ölkənin ümumi maraqlarının getdikcə daha sıx şəkildə bir-birinə bağlandığını bildirib.

VOA xəbər verir ki, Pezeşkian Pakistanın Baş naziri Şahbaz Şərifə ünvanladığı təbrik məktubunda müstəqillik ildönümünü Pakistan xalqının əldə etdiyi nailiyyətləri qeyd etmək üçün dəyərli fürsət kimi qiymətləndirib.

İran prezidenti İran və Pakistan arasında uzun illər ərzində formalaşmış strateji münasibətlərin dərinləşdirilməsi və genişləndirilməsi istiqamətində yeni mərhələnin başladığını vurğulayıb.

Pezeşkian iki xalq arasında mövcud olan dərin tarixi, mədəni və sivilizasiya əlaqələrinin ikitərəfli münasibətlərin gələcəkdə daha da inkişaf etdirilməsi üçün mühüm imkan yaratdığını qeyd edib.

O bildirib ki, İran Pakistanla hərtərəfli əlaqələrin daha da möhkəmləndirilməsində qətiyyətlidir və ikitərəfli münasibətlərin inkişaf etdirilməsi, eləcə də hər iki tərəfin ümumi maraqlarının təmin olunması istiqamətində daha səmərəli addımlar atmağa hazırdır.

Pezeşkian İran və Pakistan arasında əməkdaşlığın gücləndirilməsinin hər iki ölkənin ortaq maraqlarına xidmət etdiyini vurğulayıb.