BAKI,VOA, Nailə Babazadə

Kuba Prezidenti Miqel Dias Kanel ABŞ-ın Kubaya qarşı hərbi hücum ehtimalının gündəmdə olduğunu bildirib. Paytaxt Havanada Kuba İnqilabının "sosialist xarakterinin" elan edilməsinin 65-ci ildönümü münasibətilə çıxış edən Kanel ABŞ ilə yaşanan gərginliyə toxunub.

VOA xəbər verir ki, Kanel ABŞ-ın Kubaya hərbi müdaxilə ehtimalını vurğulayaraq qeyd edib ki, ölkəsi müharibə istəmir, lakin vəzifələri müharibənin qarşısını almaq üçün hazırlıqlı olmaq və əgər bu qaçılmaz olarsa, qalib gəlməkdir. O, Kubanın qələbə qazanacaq bir dövlət olduğuna şübhə etmədiyini bildirib. Ölkənin olduqca çətin bir dövrdən keçdiyinə diqqət çəkən prezident Kuba xalqını mümkün işğala qarşı hazır olmağa çağırıb.

Prezident xalqın yaşadığı iqtisadi çətinliklərə görə ölkəyə embarqo tətbiq edən ABŞ-ı birbaşa məsuliyyətli tutub.

Xatırladaq ki, ABŞ Prezidenti Donald Tramp yanvarın 30-da Kubaya neft satan və ya təmin edən ölkələrdən gələn bütün mallara gömrük rüsumlarının tətbiqini nəzərdə tutan fərman imzalamışdı. Tramp həmçinin aprelin 13-də verdiyi bəyanatda İran gündəmindən sonra Kuba məsələsi ilə də "maraqlanacaqlarını" qeyd etmişdi. Kanel isə mümkün işğala münasibət bildirərkən özlərini müdafiə edəcəklərini və lazım gələrsə, ölkə uğrunda ölməyə hazır olduqlarını vurğulayıb.