BAKI, VOA, Nailə Babazadə

İranın xarici işlər naziri Abbas Əraqçi Tehranda keçirilən "Qüds günü" yürüşü zamanı verdiyi bəyanatda qlobal enerji bazarlarındakı bahalaşmaya toxunub.

VOA xəbər verir ki, nazir dünya bazarında neft qiymətlərinin yüksəlməyə davam edəcəyini proqnozlaşdıraraq, bu vəziyyətin birbaşa günahkarının ABŞ və İsrail olduğunu bildirib. Əraqçi qeyd edib ki, sözügedən ölkələrin Yaxın Şərqdə apardığı aqressiv siyasət regionu fəlakətə sürükləyir və bunun iqtisadi fəsadlarına görə məhz Vaşinqton və Təl-Əviv hesab verməlidir.

İsrail və ABŞ-ın fevralın 28-dən bəri davam edən intensiv hücumlarına baxmayaraq, İran xalqının öz ideallarına sadiq qaldığını vurğulayan Əraqçi, milyonlarla insanın küçələrə axışdığını qeyd edib. O, təkcə Tehranda deyil, ölkənin bütün şəhərlərində İslam Respublikasına, Qüdsə və Fələstin davasına olan dəstəyin sarsılmaz olduğunu bildirib. Nazirin sözlərinə görə, bu kütləvi iradə İran xalqının gücünü düşmənlərə qəbul etdirmək üçün ən mühüm amildir.

Nazir həmçinin vurğulayıb ki, İran rəhbərliyi illərdir müdafiə etdiyi prinsiplərdən geri çəkilməyəcək və hərbi təzyiqlərə diplomatik və iqtisadi müstəvidə müqavimət göstərməyə davam edəcək. Neft qiymətlərindəki qeyri-sabitliyin qlobal iqtisadiyyata vurduğu zərərin məsuliyyətini Qərb koalisiyasının üzərinə qoyan Əraqçi, bölgədə sülhün yalnız işğal və hücumların dayandırılması ilə mümkün olacağını xatırladıb. İran tərəfi regional güc balansını qorumaq üçün bütün imkanlarını səfərbər etdiyini bəyan edib.