BAKI,AzerVoice, Nailə Babazadə
Avropa İttifaqı (Aİ) məlumat təhlükəsizliyi ilə bağlı narahatlıqlar səbəbindən deputatların və əməkdaşların xidməti cihazlarında süni intellekt funksiyalarını deaktiv edib.
AzerVoice xəbər verir ki, “Politico” nəşrinin məlumatına görə, Aİ-nin informasiya texnologiyaları bölməsi süni intellekt tətbiqləri olan cihazlarda kibertəhlükəsizlik və məlumatların qorunmasının tam təmin edilə bilməyəcəyi qənaətinə gəlib. Araşdırma zamanı müəyyən edilib ki, bəzi süni intellekt funksiyaları tapşırıqları yerinə yetirmək üçün bulud xidmətlərindən istifadə edir və məlumatları cihazdan kənara ötürür.
Bu qiymətləndirmədən sonra Aİ üzvlərinin və əməkdaşlarının iş cihazlarında süni intellektə əsaslanan funksiyalar söndürülüb. Bundan əlavə, deputatlara xidməti məqsədlər üçün istifadə etdikləri şəxsi cihazlarda da oxşar təhlükəsizlik tədbirlərinin tətbiqi tövsiyə olunub.
Qeyd edək ki, Avropa İttifaqı son illərdə xarici ölkələrdən texnologiya tədarükü ilə bağlı riskləri nəzərə alaraq məlumat təhlükəsizliyi siyasətini gücləndirib. Aİ daha əvvəl, 2023-cü ildə əməkdaşların cihazlarında “TikTok” sosial şəbəkəsinin istifadəsini də qadağan etmişdi.