BAKI, VOA Orxan Qədirzadə
Kosmik uçuşlar, aviasiya və süni intellekt sahəsində fəaliyyət göstərən SpaceX ABŞ-ın Luiziana ştatında 100 milyard dollar sərmayə ilə yeni kosmik baza quracağını açıqlayıb.
Şirkətin məlumatına görə, “Starbase, Louisiana” adlandırılacaq baza ildə minlərlə kosmik buraxılışı dəstəkləyəcək və SpaceX-in uçuş imkanlarını əhəmiyyətli dərəcədə artıracaq.
Layihənin növbəti 10 il ərzində birbaşa 3 min, dolayı olaraq isə 8 mindən çox yeni iş yeri yaratması gözlənilir. Baza SpaceX-in dördüncü və ən böyük buraxılış kompleksi olacaq və xüsusilə “Starship” missiyalarının sayının artırılmasında mühüm rol oynayacaq.
Tamamlandıqdan sonra bazada hər birində iki buraxılış meydançası və yanacaq infrastrukturu olmaqla beş buraxılış kompleksi yaradılacaq. Ərazidə həmçinin yanacaq və enerji istehsalı, kosmik aparatların hazırlanması və işçilərlə ailələri üçün yaşayış məntəqələri nəzərdə tutulur.
Tikinti işlərinin 2027-ci ildə başlanması, ilk buraxılışın isə 2029-cu ildə həyata keçirilməsi planlaşdırılır.
SpaceX-in rəhbəri İlon Mask layihəni indiyədək yalnız elmi fantastikada təsəvvür edilən kosmik bazanın yaradılması kimi qiymətləndirib. O bildirib ki, insanların kosmosa səyahətinin təyyarə ilə uçuş qədər adi hala gəlməsi ulduzların araşdırılması üçün əsas şərtdir.