BAKI, AzerVoice, Nailə Babazadə

ABŞ Prezidenti Donald Tramp, Asiya səfəri çərçivəsində görüşməyi planlaşdırdığı Çin Prezidenti Si Cinpinin, Rusiya-Ukrayna müharibəsinin sona çatması üçün Rusiya Prezidenti Vladimir Putin üzərində böyük təsirə malik ola biləcəyini bildirib.

AzerVoice xəbər verir ki, Tramp Oval Ofisdə jurnalistlərin suallarını cavablandırarkən bildirib.

Tramp, Si Cinpini “böyük bir ölkənin güclü lideri” kimi xarakterizə edib.

ABŞ lideri əlavə edib ki, gələn həftə həyata keçirəcəyi Asiya səfəri çərçivəsində Cənubi Koreyada Çin Prezidenti ilə görüşəcək, və burada bir çox beynəlxalq məsələni, o cümlədən Rusiya-Ukrayna müharibəsini müzakirə edəcəklər:

“Si Cinpin ilə Rusiya-Ukrayna məsələsini danışacağıq,” – deyə Tramp vurğulayıb.

Xatırladaq ki, Tramp 16 oktyabrda sosial media hesabında paylaşım edərək, Putinlə Macarıstanın Budapeşt şəhərində görüşərək müharibənin dayandırılması yollarını müzakirə etməyi planlaşdırdıqlarını açıqlamışdı.

Lakin 21 oktyabrda Ağ Evdən verilən açıqlamada yaxın gələcəkdə Tramp və Putin arasında sammitin gözlənilmədiyi bildirilmiş, bundan sonra Tramp “Putinlə görüşü mənə doğru gəlmədiyi üçün ləğv etdim” ifadəsini işlətmişdi.