BAKI, AzerVoice, Nailə Babazadə

İraq Baş naziri Məhəmməd Şiəəs-Sudani bu gün (çərşənbə günü) bəyan edib ki, İraq hökuməti ABŞ-la ikitərəfli əməkdaşlığın davamlı dinamikasını qorumağa və son aylarda əldə edilmiş razılaşma və anlaşmaların icrasını davam etdirməyə böyük önəm verir.

AzerVoice xəbər verir ki, Sudani bu fikirləri ABŞ Dövlət katibi Marko Rubio ilə telefon danışığı zamanı səsləndirib. İraq hökumətinin yaydığı bəyanata görə, baş nazir bildirib ki, hökumət iqtisadi əlaqələri genişləndirmək, cəlbedici investisiya mühitini inkişaf etdirmək, həmçinin ABŞ şirkətlərinin İraqda fəaliyyət göstərməsi üçün əlverişli şərait yaratmaq istiqamətində çalışır.

O qeyd edib ki, bu səylər iki ölkə arasında formalaşmış ortaq baxışı əks etdirir.

Sudani əlavə edib ki, “Bağdad və Vaşinqton arasında dostluq münasibətləri konstruktiv dialoq və davamlı əlaqə üzərində qurulub və bu münasibətlər qarşılıqlı maraqları gücləndirməyə, qarşılıqlı etimadı möhkəmləndirməyə xidmət edir. Bu, həmçinin ortaq məqsədlərin reallaşdırılması üçün daimi məsləhətləşmə və koordinasiyanın zəruriliyini göstərir. Hər hansı birtərəfli addımlardan çəkinmək vacibdir.”

Baş nazir vurğulayıb ki, İraq hökuməti demokratik prosesi möhkəmləndirməyə, bununla da ölkədə siyasi sabitlik və davamlı inkişafı təmin etməyə sadiqdir.

İraq hökumətinin açıqlamasına əsasən, telefon danışığı zamanı tərəflər həmçinin İraqda qarşıdan gələn seçkilərlə bağlı konstitusion proses, eləcə də Bağdad və Vaşinqton arasında ikitərəfli münasibətlərin möhkəmləndirilməsi yollarını müzakirə ediblər.

Bəyanatda vurğulanıb ki, tərəflər siyasi, iqtisadi, mədəni, təhlükəsizlik və hərbi sahələrdə dərin və çoxölçülü tərəfdaşlığı möhkəmləndirmək üçün ortaq səylərin davam etdirilməsi barədə razılığa gəliblər.