BAKI, AzerVoice, Nailə Babazadə

Rusiya Prezidenti Vladimir Putin və ABŞ Prezidenti Donald Tramp arasında keçiriləcək görüş öncəsi Rusiya nümayəndə heyəti ABŞ-ın Alyaska ştatındakı Enkorec (Anchorage) şəhərinə çatıb.

AzerVoice xəbər verir ki, bu barədə Rusiya mətbuatı məlumat yayıb.

Heyətdə Rusiya Xarici İşlər Naziri Sergey Lavrov, Müdafiə Naziri Andrey Belousov, Maliyyə Naziri Anton Siluanov, Kremlin xarici siyasət üzrə müşaviri Yuriy Uşakov və beynəlxalq iqtisadi əməkdaşlıq üzrə xüsusi nümayəndə Kiril Dmitriyev yer alır.

Məlumata görə, görüşü işıqlandırmaq üçün təxminən 50 rusiyalı jurnalist də Alyaskaya gəlib və Alaska Airlines Center arenasına yerləşdirilib.

Kremlin mətbuat xidmətinin verdiyi məlumata görə, Vladimir Putin Alyaskaya səfər öncəsi Rusiyanın şimal-şərqində yerləşən Magadan şəhərinə baş çəkib. O, burada Magadan vilayətinin qubernatoru Sergey Nosov ilə görüş keçirəcək, həmçinin sənaye müəssisələrini və idman-kültür mərkəzlərini ziyarət edəcək.

Qeyd edək ki,iki liderin görüşünün yerli vaxtla saat 22:30-da başlaması planlaşdırılır. Görüşdə əsas müzakirə mövzusu Ukrayna müharibəsinin diplomatik yolla həlli, həmçinin ikitərəfli münasibətlər və beynəlxalq məsələlər olacaq.

Görüşün sonunda birgə mətbuat konfransı da nəzərdə tutulub.