BAKI, Azervoice , Nərmin Ağayeva

Yeni araşdırmaya görə, uşaqların bədən çəkisinə ananın genetik təsiri ataya nisbətən daha güclüdür.

Azervoice xəbər verir ki, PLOS Genetics jurnalında dərc olunan tədqiqata əsasən, uşaqlar DNT-lərinin yarısını hər iki valideyndən miras alsalar da, ananın genetikası bədən kütləsi indeksinə (BKİ) daha əhatəli təsir göstərir.

London Universitet Kollecinin tədqiqatçısı Liam Wright bildirib ki, bu təsir birbaşa ötürülən genlərlə yanaşı, hamiləlik dövründəki şərait və valideynlik vərdişləri kimi dolayı faktorlarla da əlaqəlidir.

Araşdırmada 2600-dən çox britaniyalı ailənin 17 ilə qədər izlənilməsi nəticəsində məlum olub ki, həm ana, həm də atanın BKİ uşağın çəkisinə təsir edir. Lakin ataların təsiri əsasən birbaşa genetik ötürmələrlə məhdudlaşır, anaların təsiri isə həm genetik, həm də ətraf mühit amilləri ilə genişlənir.

Qeyd edək ki, alimlər bu nəticələrin anaları günahlandırmaq məqsədi daşımadığını, əksinə, hamiləlik dövründə sağlam çəkiyə dəstək tədbirlərinin piylənmənin nəsillərarası ötürülməsini azalda biləcəyini vurğulayıblar.