BAKI, AzerVoice

Belçika Müdafiə və Xarici Ticarət naziri Theo Francken, 2026-cı ildə Belçika şahzadəsi Astrid ilə birlikdə Türkiyəyə rəsmi səfər edəcəklərini açıqlayıb.

AzerVoice xəbər verir ki, səfərin məqsədi iqtisadi əlaqələri gücləndirmək və yeni əməkdaşlıq imkanlarını araşdırmaqdır.

Francken bildirib ki, bu səfər çərçivəsində Türkiyəyə 500-600 nəfərlik iqtisadi nümayəndə heyəti ilə gələcəklər.

“Yalnız müdafiə naziri deyil, eyni zamanda xarici ticarət naziri olaraq gələcəyəm. İyun ayında təxminən bir həftəlik səfər planlaşdırılır və bu, Belçikanın indiyədək təşkil etdiyi ən böyük iqtisadi heyət olacaq,” – deyə Francken qeyd edib.

Nazir əlavə edib ki, Türkiyə, Avropa İttifaqı xaricində Belçikanın dördüncü ən böyük ticarət tərəfdaşıdır.

“Birləşmiş Krallıq, Çin və ABŞ-dan sonra Türkiyə gəlir. 2024-cü ildə iki ölkə arasında mallar və xidmətlər üzrə ticarət dövriyyəsi 12,5 milyard avroya çatıb,” – deyə Francken vurğulayıb.

Nazir, yalnız müdafiə sahəsində deyil, iqtisadiyyat da daxil olmaqla bütün sahələrdə əməkdaşlığın gücləndirilməsinin vacibliyinə diqqət çəkib.

Türkiyənin müdafiə sənayesindəki inkişafını yüksək qiymətləndirən Francken, ölkənin innovasiya, tədqiqat və inkişaf sahələrində ciddi irəliləyişlər əldə etdiyini deyib.

“Türkiyə gələcəyə yönəlik real bir nümunədir,” – deyə o, əlavə edib.