BAKI,VOA,Yusif Şərifzadə
Süni intellekt əsaslı kod yoxlama platforması CodeRabbit yeni maliyyələşmə mərhələsində 143 milyon dollar investisiya cəlb edib və şirkətin dəyəri 1,5 milyard dollar olaraq qiymətləndirilib.
VOA xəbər verir ki, maliyyələşmə raunduna Atomico və Smash Capital birgə rəhbərlik edib.
Yeni investorlardan BMW i Ventures, Datadog və Hirtle Callaghan da raundda iştirak edib.
İnvestorlar hesab edirlər ki, süni intellekt əsaslı proqramlaşdırma alətlərinin və “vibe coding” yanaşmasının sürətli yayılması proqram təminatının izlənilməsi, kod səhvlərinin aradan qaldırılması və keyfiyyətə nəzarət xidmətlərinə tələbatı artıracaq.
CodeRabbit proqramçılara kod keyfiyyətini yüksəltməyə və daha səmərəli işləməyə kömək edir. Platforma dəyişikliklərin təsirini izah edir, həmçinin istehsal mühitindəki kodları zəifliklər və texniki risklər baxımından izləyir.
Şirkətin son maliyyələşməsi ötən ildən az müddət sonra baş verib. CodeRabbit bundan əvvəl 60 milyon dollarlıq B seriyası investisiya raundu keçirmişdi.
Atomico vençur kapital şirkətinin tərəfdaşı Luka Eyzenşteken şirkətin idarə heyətinə qoşulacaq.
Eyzenşteken bildirib ki, süni intellekt qlobal iqtisadiyyat üçün əsas infrastruktur elementinə çevrildikcə, təşkilatlar istifadə olunan modeldən asılı olmayaraq proqram təminatını yoxlaya bilən müstəqil idarəetmə mexanizmlərinə daha çox ehtiyac duyacaq.
ABŞ-ın San-Fransisko şəhərində yerləşən CodeRabbit yaxın zamanda Londonda ofis açıb. Şirkət Avropada genişlənməyi, həmçinin Yaponiya və digər Asiya bazarlarına daxil olmağı planlaşdırır.