BAKI,VOA,Yusif Şərifzadə

Səudiyyə Ərəbistanının milli gəmiçilik şirkəti “Bahri” Qırmızı dənizdə şirkətə məxsus “Amzan” gəmisinin hücuma məruz qaldığını təsdiqləyib. Şirkətin məlumatına görə, hadisə zamanı gəminin bütün heyət üzvləri xəsarət almadan xilas olublar.

VOA xəbər verir ki, “Bahri” sosial şəbəkədə yaydığı açıqlamada “Amzan” gəmisinin Qırmızı dənizdə hücuma məruz qaldığını bildirib.

“Bütün heyət üzvləri təhlükəsizdir və xəsarət alan olmayıb”, – şirkətin açıqlamasında qeyd olunub.

“Bahri”nin açıqlaması Yəməndəki Husilərin gəmini hədəfə aldıqlarını bildirməsindən sonra verilib.

Husilərin hərbi sözçüsü daha əvvəl “Amzan”ın Səudiyyə Ərəbistanının Yənbu şəhəri sahilləri yaxınlığında ballistik raketlə hədəfə alındığını iddia etmişdi.

Husilər raketin gəmiyə birbaşa dəydiyini və nəticədə tankerdə böyük yanğının başladığını bildirmişdilər.

Səudiyyə şirkətinin son açıqlaması gəminin həqiqətən hücuma məruz qaldığını təsdiqləsə də, “Bahri” zərbənin ballistik raketlə həyata keçirilib-keçirilmədiyi barədə məlumat verməyib.

Böyük Britaniyanın Dəniz Ticarəti Əməliyyatları Mərkəzi də daha əvvəl Yənbudan təxminən 63 dəniz mili, yəni 117 kilometr qərbdə bir tankerin naməlum mərmi ilə vurulduğunu açıqlamışdı.

Hadisə Qırmızı dənizdə kommersiya gəmiçiliyinin təhlükəsizliyi ilə bağlı narahatlıqları yenidən artırıb. Gəmiyə dəymiş ziyanın miqyası və hücumdan sonra onun hərəkətini davam etdirib-etdirmədiyi barədə hələlik ətraflı məlumat verilməyib.