BAKI,VOA,Yusif Şərifzadə

Fransa İsrail hakimiyyətini işğal altındakı İordan çayının qərb sahilinin Qusra kəndində fələstinlilərin evlərini zəbt edən köçkünləri həbs etməyə və məsuliyyətə cəlb etməyə çağırıb. Paris həmçinin fələstinli mülki şəxslərin qorunmasını tələb edib.

VOA xəbər verir ki, Fransa Xarici İşlər Nazirliyi İsrailli köçkünlərin İordan çayının qərb sahilindəki Qusra kəndində bir neçə fələstinli ailənin evini ələ keçirməsini və mülki şəxslərə qarşı zorakılıq törədilməsini kəskin şəkildə pisləyib.

Fransa tərəfi İsrail hakimiyyətindən evləri zəbt edən şəxslərin həbs olunmasını və onların törətdikləri əməllərə görə məsuliyyətə cəlb edilməsini istəyib.

Fransa Xarici İşlər Nazirliyi həmçinin İsrail hakimiyyətini işğal altındakı ərazilərdə yaşayan fələstinli mülki şəxslərin təhlükəsizliyini təmin etməyə çağırıb.

Qusra kəndində baş verən hadisə İordan çayının qərb sahilində İsrailli köçkünlərin fələstinlilərə qarşı zorakılığı və onların yaşayış sahələrinə müdaxiləsi ilə bağlı narahatlıqların artdığı bir vaxtda gündəmə gəlib.

Beynəlxalq hüquqa əsasən, İsrailin işğal altındakı İordan çayının qərb sahilində saldığı yaşayış məntəqələri qanunsuz hesab olunur.

Fransanın açıqlaması İsrailin yaşayış məntəqələri siyasətinə və fələstinli mülki şəxslərə qarşı zorakılıq hallarına münasibətdə beynəlxalq təzyiqlərin davam etdiyini göstərir.