BAKI,VOA,Yusif Şərifzadə

Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas İranın Bəhreyn və Küveytə, eləcə də Hörmüz boğazı yaxınlığında kommersiya gəmilərinə qarşı hücumlarını pisləyib.

VOA xəbər verir ki, Kaya Kallas sosial şəbəkədə paylaşdığı açıqlamada İranın Bəhreyn və Küveytə hücumlarını qəbuledilməz adlandırıb. O bildirib ki, Hörmüz boğazı yaxınlığında gəmilərə qarşı həyata keçirilən hücumlar əldə olunmuş anlaşmanı pozur və enerji tədarükünün bərpasını təhlükə altına salır.

Kallas qeyd edib ki, gələn bazar ertəsi Avropa İttifaqı ilə Körfəz ölkələrinin xarici işlər nazirləri görüş keçirəcəklər. Onun sözlərinə görə, görüşdə əldə olunmuş razılaşmanın icrasına dəstək verilməsi, eləcə də Hörmüz boğazı və Qırmızı dənizdə gəmiçilik azadlığının qorunması məsələləri müzakirə ediləcək.

Avropa İttifaqı hesab edir ki, beynəlxalq dəniz yollarında təhlükəsizliyin təmin olunması və enerji daşımalarının fasiləsiz davam etməsi qlobal iqtisadi sabitlik üçün mühüm əhəmiyyət daşıyır.