BAKI,VOA,Yusif Şərifzadə

ABŞ Prezidenti Donald Tramp İranla bağlı hərbi qarşıdurmanın arxa planda qalmasını və diqqətin yenidən diplomatik danışıqlara yönəlməsini istəyir.

VOA xəbər verir ki, bu barədə Vaşinqtondan hazırlanan təhlildə bildirilir.

Məlumata görə, Donald Tramp sosial şəbəkədə paylaşım edərək çərşənbə axşamı Qətərin paytaxtı Dohada ABŞ və İran nümayəndələri arasında görüş keçiriləcəyini təsdiqləyib.

Təhlildə qeyd olunur ki, Tramp son dövrlərdə sərt bəyanatlar səsləndirsə də, razılaşmanın əldə olunmaması və ya qarşıdurmaların yenidən alovlanacağı təqdirdə ciddi addımlar atacağı ilə hədələsə də, eyni zamanda təmkinli mövqe nümayiş etdirməyə çalışır.

Bildirilir ki, ABŞ Prezidenti atəşkəsin davam etməsini, danışıqların irəliləməsini və tərəflər arasında yekun razılaşmanın əldə olunmasını istəyir.

Təhlil müəllifinin fikrincə, bunun əsas səbəblərindən biri daxili siyasi amillərdir. ABŞ-də qarşıdan gələn aralıq seçkiləri fonunda Tramp İranla müharibə mövzusunun artıq gündəmdə qalmasını istəmir.

Qeyd olunur ki, bu müharibə ABŞ ictimaiyyətində geniş dəstək qazanmadığından Trampın siyasi mövqeyinə də mənfi təsir göstərib.

Bu baxımdan, Ağ Ev rəhbərinin mümkün qədər tez razılaşmanın əldə olunmasına və İranla bağlı böhranın gündəmdən çıxmasına üstünlük verdiyi vurğulanır.