BAKI,VOA Orxan Qədirzadə

Suriyadakı düşərgələrdən Avstraliyaya qaytarılan və İŞİD terror təşkilatı ilə əlaqəli olduqları bildirilən bir qrup qadın ölkəyə daxil olduqdan sonra həbs təhlükəsi ilə üz-üzədir.

VOA xəbər verir ki, dörd qadın və doqquz uşaq bu gün axşam saatlarında Avstraliyanın Sidney və Melburn şəhərlərinə çatacaq. Onların Suriyadakı qaçqın düşərgələrindən Qətərin paytaxtı Doha üzərindən təxliyə edildiyi bildirilib.

Avstraliya polisi bəzi qadınların “terror cinayətləri”, o cümlədən qadağan olunmuş bölgəyə səfər etmək və “kölə alverində iştirak” kimi ittihamlarla məsuliyyətə cəlb olunacağını açıqlayıb.

Yeni Cənubi Uels ştatının polis komissarı Mal Lanyon əməliyyat səbəblərinə görə konkret ad açıqlamadığını, lakin federal qurumlarla sıx əməkdaşlıq etdiklərini bildirib.

Qərb ölkələrindən yüzlərlə qadının 2010-cu illərin əvvəllərində İŞİD-in təsiri artığı vaxt Yaxın Şərqə getdiyi, bir çoxunun isə terror təşkilatına qoşulan həyat yoldaşlarını izlədiyi qeyd olunur.

Avstraliya, Kanada və Böyük Britaniya kimi ölkələr hələ də Suriyada qalan vətəndaşlarının geri qaytarılması və hüquqi statusu ilə bağlı çətinliklərlə üzləşir.

“İŞİD gəlinləri” kimi tanınan bu qadınların taleyi Avstraliya cəmiyyətində ciddi müzakirələrə səbəb olub. Avstraliya İnsan Hüquqları Komissiyası mart ayında hökuməti Suriyanın məşhur Roj düşərgəsində qalan 34 qadın və uşağın geri qaytarılmasına yardım etməyə çağırmışdı.

Bununla yanaşı, bəzi siyasi və ictimai dairələr həmin şəxslərin ölkəyə qarşı çıxaraq terror təşkilatına qoşulduqlarını və nəticələrinə özlərinin cavab verməli olduqlarını bildirirlər.

Avstraliyanın daxili işlər naziri Toni Börk isə geri dönən qadınların “təhlükəli terror təşkilatına qoşulmaqla dəhşətli seçim etdiklərini” vurğulayıb.

Qeyd edək ki, bu, Suriyadan Avstraliyaya həyata keçirilən ilk repatriasiya prosesi deyil. Daha əvvəl də 2019, 2022 və 2025-ci illərdə kiçik qadın və uşaq qrupları ölkəyə geri qaytarılmışdı.