BAKI,VOA, Fərid Mikayılov
Almaniya kansleri beynəlxalq gərginlik fonunda ABŞ-ın mövqeyinə dair tənqidi açıqlama verib.
VOA xəbər verir ki, Fridrix Merts ABŞ-ın İranla bağlı münaqişəni tez bir zamanda sona çatdırmaq imkanına malik olmadığını bildirib.
Onun sözlərinə görə, mövcud vəziyyətdə Vaşinqtonun strategiyası kifayət qədər təsirli görünmür.
Merts qeyd edib ki, İranın gözləniləndən daha güclü olduğu və ABŞ tərəfinin danışıqlarda inandırıcı yanaşma ortaya qoya bilmədiyi müşahidə olunur. O vurğulayıb ki, bu tip münaqişələrə daxil olmaq qədər, onlardan çıxış yolu tapmaq da mühüm məsələdir.
Almaniya kansleri əvvəlki nümunələrə istinad edərək bildirib ki, Əfqanıstan və İraq müharibələri oxşar problemlərin yaşandığını göstərib. Onun fikrincə, ABŞ bu münaqişəyə kifayət qədər aydın plan olmadan daxil olub və bu da vəziyyətin daha da mürəkkəbləşməsinə səbəb olub.
Merts əlavə edib ki, İran tərəfi danışıqlar prosesində yüksək bacarıq nümayiş etdirir və bu amil də münaqişənin həllini çətinləşdirir.