BAKI,AzerVoice, Orxan Qədirzadə

Hizbullah hərəkatının baş katibi Nəim Qasım bildirib ki, təşkilatın silahı Livanın milli gücünün tərkib hissəsidir və bu silahın ləğvi ölkədəki problemləri həll etməyəcək.

AzerVoice xəbər verir ki, o, çərşənbə günü çıxışında vurğulayıb ki, İsrail hələ də qarşısına qoyduğu məqsədlərə çata bilməyib və yaxın gələcəkdə də buna nail ola bilməyəcək.

“ABŞ indi siyasət vasitəsilə İsrailin müharibə ilə əldə edə bilmədiyini qazanmağa çalışır.”-deyə o bildirib.

Qasım bildirib ki, ABŞ-ın Livan və regiondakı müdaxilələri təhlükəlidir və bölgə xalqlarının suverenliyinə təhdid yaradır.

“Vaşinqton qətliamları ört-basdır edir və Yaxın Şərqdə genişlənmə siyasətini davam etdirir.”-deyə o əlavə edib.

Hizbullah rəsmisi ABŞ-ın livan əsilli xüsusi elçisi Tom Barraka müraciət edərək deyib:
“Livanı təhdid etməyi dayandırın. Biz ölkəmizin gücünü sındırmağa, onu İsrailin genişlənmə planlarının bir hissəsinə çevirməyə imkan verməyəcəyik.”

Nəim Qasım çıxışında Livan Mərkəzi Bankının sabiq rəhbəri Riyad Səlameyə də toxunaraq məhkəmənin onu 14 milyon dollar zəmanət qarşılığında azadlığa buraxmasını tənqid edib.

“Riyad Səlame ABŞ-ın məmuru deyil. Hökumət onun fəaliyyətinə son qoymalıdır.”-deyə o bildirib.