BAKI, AzerVoice, Fərid Mikayılov

Suriya Prezidenti Əhməd əş-Şəraa Moskvaya rəsmi səfəri çərçivəsində Rusiya Prezidenti Vladimir Putinlə Kremlin sarayında görüş keçirib.

AzerVoice xəbər verir ki, Rusiya Prezidenti Vladimir Putin görüş zamanı bildirib ki, Moskva ilə Dəməşq arasında münasibətlər Sovet dövründən bəri qarşılıqlı etimada və strateji tərəfdaşlığa söykənir.

“Suriya xalqının maraqlarını hər zaman qorumuşuq. Hazırda 4 min gənc suriyalı tələbə Rusiyada ali təhsil alır. Onlar Suriya cəmiyyətinin gələcəyini quracaq yeni nəsildir” – deyə Putin vurğulayıb.

Rusiya lideri həmçinin qeyd edib ki, Moskva Suriya ilə ikitərəfli əlaqələri və əməkdaşlıq proqramlarını daha da genişləndirməyə davam edəcək.

Suriya Prezidenti Əhməd əş-Şəraa öz növbəsində səfərin ciddi və strateji xarakter daşıdığını bildirib.

“Bu, rəsmi bir ziyarətdən çox, iki xalq arasında dərin əlaqələrin göstəricisidir. Suriya və Rusiya arasında tarixi münasibətlər mövcuddur. Suriya dövlətinin yenidən qurulması prosesində Rusiyanın rolu mühüm olacaq” – deyə Şəraa qeyd edib.

O, həmçinin Rusiya ilə infrastruktur, enerji və müdafiə sahələrində əməkdaşlığın genişləndirilməsi istiqamətində işlərin davam etdiriləcəyini bildirib.