BAKI,AzerVoice, Fərid Mikayılov

Kolumbiya Prezidenti Qustavo Petro ABŞ prezidenti Donald Trampı Qəzzadakı qırğınlarda iştirakına görə ittiham edib.

AzerVoice xəbər verir ki, Petro jurnalistlərə açıqlamasında Roma Statutuna istinad edərək qeyd edib ki, insanlığa qarşı cinayətlərə görə beynəlxalq hüquq çərçivəsində istənilən şəxs məsuliyyət daşıya bilər.

“Əgər Tramp bu günə qədər olduğu kimi qırğınlarda şərik olaraq qalırsa, həbsdən başqa heç nəyi haqq etmir. ABŞ ordusu da belə hallarda ona itaət etməməlidir”- deyə o bildirib.

Petro daha öncə BMT Baş Assambleyasındakı çıxışında və Nyu-Yorkdakı mitinqdə də oxşar çağırışlar etmişdi. O, Fələstinin azad edilməsi üçün BMT mandatı altında “qlobal ordu”nun yaradılmasını təklif edib.

“Biz güclü bir orduya ehtiyac duyuruq – İsrail ordusundan da, ABŞ ordusundan da güclü. İlk missiyası isə Qəzzanın azad olunması olmalıdır”- deyə Petro vurğulayıb.

Petro xatırladıb ki, ABŞ və İsrail Roma Statutunun tərəfi olmasa da, Kolumbiya bu müqaviləyə qoşulub. Onun sözlərinə görə, Roma Statutu müharibə cinayətləri, insanlığa qarşı cinayətlər və beynəlxalq cinayətləri müəyyən edir. Bu çərçivədə təqsirləndirilən şəxslər istənilən ölkədə saxlanıla bilər.