BAKI, AzerVoice, Nailə Babazadə

25 sentyabr 2025-ci il tarixində Bakı Təşəbbüs Qrupunun təşkilatçılığı ilə BMT Baş Assambleyasının 80-ci sessiyası çərçivəsində təşkilatın Nyu Yorkdakı mənzil-qərargahında “Bujival razılaşmasından sonra Dənizaşırı ərazilər: rekolonizasiya, yoxsa dekolonizasiya?” adlı beynəlxalq konfrans keçiriləcək.

AzerVoice xəbər verir ki, konfransda Fransanın dənizaşırı əraziləri — Kanaki (Yeni Kaledoniya), Qvadelup, Martinik, Reyunyon, Mahoi Nui (Fransız Polineziyası), Fransız Qvianası, eləcə də Niderlandın Boneyra, Aruba, Sen Martin kimi müstəmləkə ərazilərində fəaliyyət göstərən müstəqillik hərəkatlarının liderləri, beynəlxalq dekolonizasiya ekspertləri və Bakıda əsası qoyulmuş Beynəlxalq Dekolonizasiya Cəbhəsinin nümayəndələri iştirak edəcəklər.

Konfransda, Fransa tərəfindən “sabitlik və birgə gələcək” adı ilə təqdim edilən Bujival razılaşmasının əsl mahiyyəti müzakirə olunacaq. Həmçinin bu razılaşma Yeni Kaledoniyanın müstəqilliyini təmin etməli olan əvvəlki Matinyon və Noumea sazişləri ilə müqayisə ediləcək.

Tədbirdə Kanak xalqının nümayəndələri, Bujival razılaşmasını niyə qəbul etmədiklərini beynəlxalq ictimaiyyətə açıqlayacaqlar. Konfransda, eyni zamanda, bu razılaşmadan sonra Kanaki və digər dənizaşırı ərazilərin gələcəyi, Fransa hökumətinin BMT qarşısında götürdüyü, lakin yerinə yetirilməmiş öhdəlikləri və həqiqi dekolonizasiya prosesinə keçid yolları da əsas müzakirə mövzusu olacaq.

Konfransın sonunda birgə bəyanatın qəbul olunacağı gözlənilir. Tədbirin ardınca isə koloniyaların təmsilçiləri tərəfindən BMT qərargahının qarşısında dinc etiraz aksiyası keçiriləcək.