BAKI, AzerVoice, Fərid Mikayılov
Finlandiya, İsrail-Fələstin münaqişəsinin sülh yolu ilə həllini və iki dövlətli həllin həyata keçirilməsini nəzərdə tutan beynəlxalq bəyannaməyə qoşulduğunu açıqlayıb.
AzerVoice xəbər verir ki, bəyannamə iyul ayında BMT-də Səudiyyə Ərəbistanı və Fransa tərəfindən təşkil edilən beynəlxalq konfransın nəticəsi olaraq qəbul edilib. ABŞ və İsrail tədbiri boykot etmişdi.
“Fransa və Səudiyyə Ərəbistanının rəhbərliyi ilə irəli sürülən bu proses son illərdə iki dövlətli həll üçün ən əhəmiyyətli beynəlxalq təşəbbüsdür”- deyə Finlandiyanın xarici işlər naziri Elina Valtonen sosial şəbəkə hesabında yazıb.
Bəyannamədə ilk addım kimi İsrail ilə HƏMAS arasında Qəzzada iki ilə yaxın davam edən müharibənin dayandırılması göstərilir.
Finlandiya hələ ki, İspaniya və Norveç kimi bəzi Avropa ölkələrindən fərqli olaraq Fələstini dövlət kimi tanımayıb. Rəsmi Helsinkidə koalisiya hökuməti bu məsələ üzrə daxildə parçalanmış mövqedədir.